Ayiti-Edikasyon : MENFP denonse e kondane aksyon plizyè endivi ki vin simen latwoublay nan Lise Marie Jàn ak Lise Jèn Fi Potoprens

P-au-P., 15 mas 2023 [M9H] — Ministè edikasyon nasyonal ak fomasyon pwofesyonel (Menfp), denonse epi kondane aksyon malonèt, plizyè zago loray fè byen bonè maten, lendi 13 mas 2023 a, pou vin twouble fonksyonman, Lise Marie Jan, ak Lise Jèn fi nan Potoprens.

«Pami endividi sa yo, genyen ki te pote inifòm lise,  ak lòt ki te gen kagoul nan tèt yo ak brasa nan men yo. Yo kraze baryè, kraze vit plizyè machin, desann drapo e fè menas pou yo ka fèmen 2 lise sa yo » dapre Ministè ki di li regret aksyon malonet sa yo.

Se gras ak entèvansyon Lapolis ki fè plis dega pa rive fèt.

Ministè a denonse e kondane aksyon endividi sa yo e mande tout aktè, tout patnè ak tout sitwayen pou yo kontinye mete men pou defann dwa pou lavi ak dwa pou ledikasyon timoun yo, e pwoteje lekòl.

MENFP kontinye di pa gen avni san edikasyon, pa gen peyi san edikasyon. Lekòl se pi gwo zouti pou nou sove sosyete sa a ak timoun yo.

Gouvènman defakto a, te pwomèt li pral mande lapolis deplòtonnen, alantou lekòl ak sant aprantisay, ki te sispann travay depi koumansman mwa mas 2023 a, nan Pòtoprens, akoz klima laterè gang ak zam yo ap simaye san gade dèyè a. Se sa k te soti nan yon chita pale ministè edikasyon nasyonal ansanm ak ministè lajistis avèk reprezantan lekòl prive ak lekòl leta, plis sendika pwofesè.