Ayiti-Kilti : Mcc ak plizyè sektè salye memwa Chantè, konpozitè Daniel Larivière ki travèse pou Letènite
Potoprens, 6 avril 2023 [M9H] — Sektè mizikal la, an dèy apre gwo nouvèl chok sou lanmò Maestro Daniel Lariviere, ki fè vwèl pou peyi san chapo, jedi 6 avril 2023 a, nan peyi Etazini dAmerik.
Li te gen 77 lane sou tèt li. Dapre enfomasyon ki disponib, chantè a tap soufri depi kèk tan ak yon maladi.
Daniel Lariviere te fèt 10 fevriye 1946 nan Gran Nò peyi dAyiti. Kèk èdtan apre nouvèl lanmò li te gaye sou rezo sosyal yo, reyaksyon yo pat sipann tonbe nan plizyè sektè nan lavi nasyonal la.
Ministè kilti ak kominikasyon (Mcc) salye memwa maestro Daniel Lariviere
Ministè kilti ak kominikasyon, nan yon nòt li mete deyò nan aswè jedi 6 avril 2023 a, salye memwa maetro Daniel Lariviere, ki te gen anpil pasyon pou mizik Ayisyen an, epi li prezante senpati li, espasyalman bay maestro Arly Lariviere, fàn li yo, manm Okès Tropikana dAyiti, menm jan ak tout manm endistri mizik Ayisyen nan.
Mcc raple raple maestro Daniel Lariviere te gen yon talan ki ekstraòdinè, li te make epi enfliyanse endistri mizikal Ayisyen nan, atravè konpozisyon li yo, moun pap janm bliye. Lanmò Maestro Daniel Lariviere, kite yon gwo vid, dapre Mcc.
« Maestro Daniel Lariviere te yon veritab atis ki te konsakre lavi li, nan kreye bèl mizik. Li te ekri epi enteprete kèk mizik ki te pi anblematik pou Tropikana DAyiti, pami yo, Serenade des Melomanes. Li te genyen yon vrè talan epi pasyon li pou mizik lan te kontajye » dapre sa nou ka li nan yon nòt senpati Gwoup Mizikal Klass.
Menm lè Maestro Daniel Lariviere pa ansanm ak nou ankò, mizik li pral viv pou toutan. Li te kite yon mak pèsòn pa ka efase nan endistri mizikal Ayisyèn nan, epi enfliyans li pral kontinye fè santi li pandan anpil lanne ankò kap vini. Mizik li pote lajwa epi li pote tou rekonfo pou anpil moun, pou sa, nou genyen anpil rekonesans, dapre ki ekri nan dokiman Gwoup Klass la mete de yo an.
Gwoup Klass voye senpati li bay fanmi, zanmi ak fàn maestro Daniel Lariviere yo, nan peryod difisil sa a. Gwoup lan di li swete souvni Daniel Lariviere ansanm ak mizik li kapab pote rekonfò ak lapè nan jou kap vini yo.
Depa maestro Daniel Lariviere lan, se yon gwo pèt pou endistri mizikal Ayisyèn nan, dapre jounalis kiltirèl yo
Animatè kiltirèl Guy Wewe ak Huguns Le Boss, konsidere lanmò Daniel Lariviere an tankou yon gwo pèt pou mizik Ayisyen nan. Yo pataje kondoleyans yo bay tout fanmi defen an, espesyalman maestro Arly Lariviere.
Maestro Daniel Lariviere te konpoze plizyè mizik ki te gen anpil siksè, tankou Limonad, Mizè malere, Metriz, Frè kòt papa, Le Nègre, Erzulie ak Doux Tropic.
